Die verband tussen verbale/nie-verbale intelligensieverskille en persoonlikheidsfunksionering by matriekleerlinge

Abstract

Die doel met die ondersoek was om die verband tussen verbale/nie-verbale intelligensieverskille op die Nuwe Suid-Afrikaanse Groeptoets (NSAG) en persoonlikheidsfunksionering van adolessente te ondersoek. Die ondersoekgroep het uit matriekleerlinge bestaan. Hulle is volgens IK-tellings onderverdeel in drie groepe: een groep by wie die nie-verbale telling die verbale telling met 15 punte oorskry, 'n tweede groep by wie die verbale telling die nie-verbale telling met dieselfde aantal punte oorskry en 'n derde groep by wie die verbale en nie-verbale tellings met nie meer as vyf punte verskil nie. Die drie groepe is vergelyk ten opsigte van die Hoërskoolpersoonlikheidsvraelys (HSPV) en die Persoonlike, Huislike, Sosiale en Formele Verhoudingevraelys (PHSF). Eenrigtingvariansie-ontledingsis afsonderlik vir die geslagte uitgevoer om die beduidendheid van verskille tussen die groepgemiddeldes vas te stel. Seuns met 'n VIK<NVIK verskiltelling is sosiaal, veral wat hulle huislike en formele verhoudinge betref, nie so goed aangepas as die seuns met ander IK-telling patrone nie. Geen beduidende groepverskille kon vir die dogters gevind word nie.