Veranderinge en stabiliteit in die evaluatiewe stereotipes van blankes en kleurlinge in Suid-Afrika: 1973–1980/84

Abstract

In hierdie Studie is die veranderinge en stabiliteit in die evaluatiewe stereotipes ondersoek wat volwasse blanke Afrikaanssprekendes (N = 5 362), blanke Engelssprekendes (N = 4 468) en Kaaplandse kleurlinge (N = 5 759) van 1973 tot 1980/84 ten opsigte van die volgende groepe gehuldig het: hul eie groepe, die ander twee groepe, swartes en Indiërs en in die geval van die blanke ondersoekgroepe ook ten opsigte van Jode en Portugese. Die stereotipes is deur middel van sewepunt bipolêre adjektiewe beoordelingskale gemeet. Op grond van die bevindings in die ondersoek, naamlik dat daar geen betekenisvolle veranderinge voorgekom het nie in die stereotipes van blanke Afrikaanssprekendes ten opsigte van hul eie groep, blanke Engelssprekendes, Portugese en kleurlinge of in die stereotipes van blanke Engelssprekendes ten opsigte van blanke Afrikaanssprekendes, Jode, Portugese, Indiërs en kleurlinge of in die stereotipes van kleurlinge ten opsigte van blanke Afrikaanssprekendes en Indiërs, is die gevolgtrekking gemaak dat stabiliteit, eerder as veranderinge, die stereotipes van die drie ondersoekgroepe van 1973 tot 1980/84 gekenmerk het. Veranderinge wat wel voorgekom het, kan waarskynlik aan die wisselwerking tussen 'n verskeidenheid faktore toegeskryf word, waaronder die versteuring in die geopolitieke balans in Suider-Afrika asook ander konfliksituasies en veranderinge wat gedurende die sewentigerjare in Suid-Afrika plaasgevind het.